هنغسل الطماطم طبعا كويس و نبتدى نوضبها و ده باننا هنشيل كل اللب اللى جواها و نحتفظ الجزء الناشف بس
هنحط حلة فيها ميه و نسبيها على النار لحد ما تغلى و بعدين نحط الطماطم و نسيبها لحد ما القشرة تبتدى تنفصل و يبقى ممكن اننا نقشرها بسهولة
ننشل الطماطم من الميه المغليه و نبردها بميه ساقعه و نستنى لحد ما تبرد علشان نعرف نشتغل بيها و نبتدى نقشر بروقان بقى و نحط اللى يطلع فى الخلاط لحد ما نخلص و بعدين نضربهم كويس
نحط العصير فى حلة على النار لحد ما الحجم بتاع الطماطم يوصل لربع الكمية تقريبا او ننشفها على قد ما نقدر على نار هادية جدا و كل ما نشفنا زيادة كل ما كان احسن
نضيف الخل و السكر و الفلفل الابيض و نضيف الملح و ندوق لحد ما الطعم يتظبط و بعدين نضيف التوم البودرة علشان يدى طعم و نعبي
و بالهنا و الشفا
ملاحظات
الفلفل الابيض لا يمكن استبداله بالفلفل الاسود هيدى طعم تانى
انا كنت ضفت بصل بودرة بس ادى طعم معجبنيش الصراحة فبراحتكم
الكمية دى هتديكم ما يعادل 3 زجاجات كاتشب من الحجم الكبير
لو عاوزين نعمل كمية اقل انا عملت كيلو واحد طمطام و ادانى زجاجة كاتشب حجم كبير و ده افضل علشان ما يبوظش لان مفيش مادة حافظة
لب الطماطم اوعى حد يرميه اضربيه و صفيه و يبقى عندك عصير طماطم حطيه فى الفريزر و استخدميه بعدين .